Mushers

ᕿᒧᒃᓯᖅᑏᑦ
 

 

ᓃᑰ ᐃᓄᐊᕋᖅ
 

ᒥᑦᑎᒪᑕᓕᒃ
 

ᓃᑰ ᐃᓄᐊᕋᖅ ᒥᑦᑎᒪᑕᓕᖕᒥᙶᖅᐳᖅ ᐃᓚᖏᑦ ᖃᐅᔨᒪᔭᐅᔪᑦ ᕿᒻᒥᖏᓐᓄᑦ, ᓃᑰ ᓄᑖᑦᑎᐊᒥ ᕿᒧᒃᓯᐅᑎᖃᓚᐅᖅᐳᖅ ᓱᒃᑲᓴᐅᑎᐅᓂᐊᖅᑐᒥ, ᐱᓕᕆᓇᓱᐊᖅᑕᒥᓂᒃ ᐊᔪᕐᓇᕐᓂᖅᓴᐅᑎᑦᑎᓪᓗᓂ.

ᐄᓴ ᐸᓖᑦᑐᖅ
 

ᑲᖏᖅᖢᒑᐱᒃ
 

ᐄᓴ ᓵᓚᒃᓴᓚᐅᖅᐳᖅ ᓯᕗᓂᐊᒍᑦ ᓱᒃᑲᓴᐅᑎᓂᐅᔪᒥᑦ ᒥᑦᑎᒪᑕᓕᖕᒥᑦ. ᕿᒻᒥᖏᑦ ᓱᒃᑲᓚᐅᖅᐳᑦ ᑭᓯᐊᓂ ᕿᒻᒥᖏᑦ ᐸᕐᓇᖕᓂᖃᙱᓗᐊᓚᐅᖅᐳᑦ ᓱᒃᑲᓴᐅᑎᓂᕐᒧᑦ ᐅᑭᐅᖑᑎᓪᓗᒍ. ᓱᒃᑲᓴᐅᑎᑎᓪᓗᒋᑦ, ᕿᒻᒥᖏᑦ ᑕᖃᓚᐅᖅᐳᑦ ᐊᒻᒪᓗ ᐃᓚᖏᑦ ᐲᖅᑕᐅᓚᐅᖅᐳᑦ ᕿᒧᒃᓯᖓᓐᓂ.

ᔪᐃᓕ ᖃᐅᓐᓇᖅ
 

ᐃᒃᐱᐊᕐᔪᒃ
 

ᔪᐃᓕᐅᑉ ᓯᕗᓪᓕᖅᐹᕆᓚᐅᖅᐹ ᑐᕌᒐᕐᒥᑦ -- ᓯᕗᓪᓕᖅᐹᑦᑎᐊᒥ ᐆᒃᑐᓚᐅᖅᐸᖏᑦ ᕿᒻᒥᖏᓐᓂᑦ. ᐊᑕᐅᓯᖅ ᐱᔾᔪᑎᒋᕐᔪᐊᓚᐅᖅᑕᖓ ᐃᓚᐅᓂᕐᒧᑦ, ᐊᓈᓇᖓ ᐅᐃᕐᖑᑦ ᐃᓚᐅᔪᒪᓚᐅᕐᒪᑦ. ᐃᓚᐅᓕᓚᐅᖅᐳᖅ ᓂᖏᐅᒐᓚᖕᓂᑦ ᐃᑲᔪᖅᓱᐃᔪᓂᑦ ᐊᒻᒪᓗ ᖁᕕᐊᓇᖅᑐᖅᑎᙳᖅᖢᓂᔾᔪᒃ!

ᐲᑕ ᓯᐊᑯᓗᒃ
 

ᓴᓂᕋᔭᒃ
 

ᐲᑕ ᓯᐊᑯᓗᒃ ᐃᖏᕐᕋᓚᐅᖅᐳᖅ ᐅᓪᓗᓂ 11-ᓂᑦ ᐱᒋᐊᕐᓂᐅᓂᐊᖅᑐᒧᑦ ᑎᑭᓐᓇᓱᐊᖅᖢᓂ. ᑕᒪᕐᒥᑦᑎᐊᖅ ᑐᕌᒐᒃᓴᓄᑦ ᐃᓚᐅᓯᒪᕗᖅ ᑕᐃᒪᙵᑦ ᐱᒋᐊᕐᓂᖓᓂ, ᐊᒻᒪᓗ ᑕᒪᓐᓇ ᑭᖑᓪᓕᖅᐹᕆᓪᓗᓂᐅᒃ. ᐊᑐᓚᐅᖅᐸᐅᒃ ᓵᓚᒃᓴᐅᑎᖏᑦ ᑮᓇᐅᔭᑦ ᓂᐅᕕᕈᑎᒋᓪᓗᓂᒋᑦ ᓄᑖᒥᑦ ᓯᑭᑑᕐᒥᑦ ᐊᖏᕐᕋᕈᑎᒋᓪᓗᓂᐅᒃ ᓴᓂᕋᔭᖕᒧᑦ.

ᑎᓃᔅ ᒪᓕᑭ
 

ᓇᐅᔮᑦ
 

ᑕᓃᔅ ᒪᓕᑭ, ᓇᐅᔮᓂ, ᐊᒥᖅᑳᖃᑎᖃᓲᖑᕗᖅ ᐊᑖᑕᒥᓂᒃ ᐹᓪᒥᑦ ᕿᒧᒃᓯᕐᓂᕐᒥᑦ ᓱᒃᑲᔪᒻᒪᕆᐊᓗᖕᓂᑦ ᐃᓚᒌᖑᔪᓂᑦ ᕿᒧᒃᓯᓂᑦ. ᐱᒃᑲᐅᓂᖏᑦ ᐃᔨᕋᖅᑑᑖ: “ᖁᕕᐊᓱᒃᑐᓂᒃ ᕿᒻᒥᖃᕐᓂᖅ” ᑕᓃᔅ ᐅᖃᖅᐳᖅ. ᕿᒻᒥᖏᓐᓄᑦ ᑎᓕᐅᕈᑎᒋᔭᖏᑦ ᓲᕐᓗ ᐃᓯᔾᔪᒃᑐᑎᑑᕗᑦ.

ᐅᓛᔪᒃ ᐹᕐᓇᐸᔅ
 

ᐃᒃᐱᐊᕐᔪᒃ
 

ᐅᓛᔫᑉ ᐱᐅᒋᓂᖅᐹᖓ ᓄᓇᕗᑦ ᑐᕌᒐᒃᓴᒥᑦ ᐅᓇᐅᕗᖅ ᐃᓅᖃᑎᒌᖕᓂᕐᒥᑦ, ᐃᓚᒌᓕᒫᑦ ᑲᑎᖦᖢᑎᒃ. ᓄᓕᐊᖓᓗ ᕉᑕ ᕿᑐᙵᒥᓂᒃ ᓇᒃᓴᐃᓐᓇᓲᖑᕗᑦ ᐊᒻᒪᓗ ᐃᕐᙳᑕᒥᓂᑦ. 9-ᒋᓪᓗᓂᐅᒃ ᓱᒃᑲᓴᐅᑎᖃᑕᐅᕗᖅ, ᐊᒻᒪᓗ ᑕᑯᓚᐅᖅᓯᒪᙱᓚᖅ ᐊᐳᒻᒥ ᑕᐃᒪᓐᓇᑎᒋ ᐃᑎᓪᓗᓂ ᐊᒻᒪᓗ ᐊᕿᖦᖢᓂ. ᓯᓚ ᐅᖅᑰᓂᖓ ᐃᓱᒫᓘᑎᒋᕙᖓ!

ᓵᒻ ᐅᒥᒃ
 

ᒥᑦᑎᒪᑕᓕᒃ
 

ᓵᒻ ᕿᒻᒥᖏᑦ ᓯᓈᓃᒐᔪᒃᐳᑦ ᒥᑦᑎᒪᑕᓕᖕᒥᑦ. ᐃᓕᓐᓂᐊᖅᓯᒪᕗᑦ ᐊᖑᓇᓱᖕᓂᕐᒥᑦ ᓇᓄᕐᓂᑦ, ᑕᐃᒫᒃ ᓇᐃᒑᖓᒥᒃ ᓇᓄᕐᓂᑦ ᐅᓪᓗᖅ ᐱᖓᔪᖓᓂ ᓱᒃᑲᓴᐅᑎᓂᕐᒥ, ᖃᓄᐃᓕᐅᕈᓐᓇᓚᐅᙱᓚᖅ ᓵᒻ ᐅᑎᖅᑎᓐᓇᓱᐊᕐᓂᕐᒧᑦ ᓱᒃᑲᓴᐅᑎᓂᕐᒧᑦ. ᓇᓄᕐᒥᑦ ᒪᓕᒃᓴᕐᓂᖏᓐᓄᑦ ᐊᓯᐅᑎᑦᑎᓚᐅᖅᐳᖅ ᐃᑲᕐᕌᖅ ᐊᑕᐅᓯᐅᑉ ᐅᖓᑖᓄᑦ!

ᕋᐃᒡᒋᓕ ᐱᐅᙱᑦᑐᖅ
 

ᑲᖏᖅᖢᒑᐱᒃ
 

ᕋᐃᒡᒋᓕ ᐱᕈᖅᓯᖃᑎᖃᓚᐅᖅᐳᖅ ᕿᒻᒥᓂᒃ ᐊᒻᒪᓗ ᐅᐃᖓᑕ ᐃᑲᔪᖅᓱᐃᔪᓂᒃ ᐃᓚᒋᔭᐅᓚᐅᖅᐳᖅ ᖃᖓᒃᑲᓐᓂᖅ, ᑭᓯᐊᓂ ᑲᑉᐱᐊᓱᓚᐅᖅᐳᖅ ᐃᓕᓯᒪᙱᓗᐊᕐᓂᖓᓂ. ᐱᒋᐊᕐᕕᖕᒧᙵᐅᕙᓪᓕᐊᑎᓪᓗᒍ, ᐊᓯᐅᔨᓚᐅᖅᐳᖅ ᒪᕐᕉᖕᓂᑦ ᕿᒻᒥᓂᑦ. ᑭᓯᐊᓂ ᕋᐃᒡᒋᓕ ᕿᒧᒃᓯᖓᓗ ᐱᓇᔪᐃᓐᓇᓚᐅᖅᐳᑦ, ᓱᒃᑲᐃᑦᑐᒥ ᐱᒋᐊᖅᖢᑎᒃ ᐊᒻᒪᓗ ᓱᒃᑲᒃᑎᑉᐸᓪᓕᐊᓪᓗᑎᒃ ᓱᒃᑲᓴᐅᑎᑎᓪᓗᒋᑦ. "ᐃᕐᙳᑕᒃᑲ ᐅᕙᓪᓂ ᐅᐱᒍᓱᓚᐅᖅᐳᑦ," ᐃᒡᓚᖅᖢᓂ ᐃᓱᐊᓂ.

ᔭᐃᒃ ᐊᕙ
 

ᒥᑦᑎᒪᑕᓕᒃ
 

ᑎᑕᒃᑎᐅᓪᓗᓂ ᐊᒻᒪᓗ ᒥᑦᑎᒪᑕᓕᖕᒥᑦ ᕿᒧᒃᓯᖅᑎᑑᔅᓲᔭᓛᖑᖃᑕᐅᕗᖅ, ᖁᖓᔮᖏᓐᓇᐅᔭᖅᖢᓂ ᐊᒻᒪᓗ ᓲᕐᓗ ᓈᑦᑎᖑᔭᒥ ᕿᒧᒃᓯᑐᐃᓐᓇᕐᓂᐊᙳᐊᖅᖢᓂ. ᐊᓱᐃᓛᒃ ᐊᑕᐅᓯᕐᒥ ᐅᓪᓗᒥ ᔭᐃᒃ ᕿᒻᒥᖏᑦ ᓴᖑᓪᓗᑎᒃ ᐃᒡᓕᓂᐅᔪᒥᑦ ᐃᖏᕐᕋᔾᔪᔾᔭᐅᓪᓗᓂ ᓇᒧᕈᓗᑐᐃᓐᓇᖅ. ᒪᓕᒃᑐᕕᓃᑦ ᓇᓄᕋᕐᒥᑦ, ᕿᒪᒃᑕᐅᓂᑰᔪᒥᑦ ᐊᒻᒪᓗ ᕿᕿᓐᓂᖅᖢᓂ ᑐᖁᓪᓗᓂ ᖃᐅᓪᓗᖅᑐᒥ ᐃᒧᓯᒪᔪᑯᓗᖕᒥ ᐊᖅᓴᑐᑦ.

ᔭᐃᒃ ᒋᐅᕼᐃᐊᑦ
 

ᑲᖏᖅᖢᒑᐱᒃ

 

ᔭᐃᒃ ᒋᐅᕼᐃᐊᑦ ᓄᑕᕋᓛᑯᓘᔮᖅᐳᖅ ᓇᐹᖅᑐᓂᑦ ᐅᑭᐅᖅᑕᖅᑐᒥ ᕿᒧᒃᓯᕐᓂᐅᔪᒥᑦ. ᑖᓐᓇ ᐊᒥᐊᓕᑲᒥᐅᑕᖅ ᑲᖏᖅᓗᒑᐱᖕᒥᐅᑕᐅᓯᒪᕗᖅ 2005-ᒥᑦ ᑕᐃᑲᙵᑦ ᑭᓯᐊᓂ ᒪᕐᕈᐃᖅᖢᓂ ᑐᕌᒐᒃᓴᒥ ᐃᓚᐅᓯᒪᓕᖅᐳᖅ ᐊᒻᒪᓗ ᓱᒃᑲᔪᒥ ᓯᕗᓪᓕᐅᖃᑕᐅᕙᓪᓕᐊᕗᖅ.

ᓇᑕᓕᓅ ᐱᐅᒑᑦᑐᖅ
 

ᐃᒡᓗᓕᒃ
 

ᑕᐃᒃᑯᑐᓇᖅᑎᑐᑦ ᐊᕕᒃᑐᖅᓯᒪᔪᓂᙶᖅᑐᓂ ᐱᓇᖕᓇᕐᒥᑦ, ᓇᑕᓕᓅ ᐊᒻᒪᓗ ᕿᒻᒥᖏᑦ ᓱᖏᐅᔾᔨᔭᕆᐊᖃᖅᐳᑦ ᖃᖅᑲᓂᒃ ᐊᒻᒪᓗ ᓯᓚᐅᑉ ᖃᓄᐃᓕᐅᕐᓂᖏᓐᓂᑦ ᕿᑭᖅᑖᓘᑉ ᑲᓇᖕᓇᖓᑕ ᓯᒡᔭᖓᓂ. ᑕᒪᓐᓇ ᐊᒃᓱᕉᓴᒃᑲᓐᓂᕐᓂᕆᓚᐅᖅᑕᖓ ᓴᖅᑭᓚᐅᖅᐳᖅ ᓱᒃᑲᓴᐅᑎᓂᐅᑉ ᐃᓱᐸᓗᐊᓂ, ᕿᒻᒥᖏᑦ ᐅᖃᕐᒪᑕ, "ᐃᖏᕐᕋᓂᐊᖅᐳᒍᑦ ᓈᒻᒪᒋᔭᑦᑎᓐᓂ."

ᐋᓐᑎ ᐊᑕᒍᑦᑖᓗᑯᑦᑐᑦ
 

ᐃᒡᓗᓕᒃ
 

ᐋᓐᑎᐅᑉ ᕿᒧᒃᓯᖏᑦ ᐃᖏᕐᕋᓚᐅᖅᐳᑦ ᓱᒃᑲᔪᒥᑦ ᐃᖏᕐᕋᐃᓐᓇᖅᑐᒥ ᐱᒋᐊᕐᓂᖓᓂ ᐃᓱᐊᓄᑦ, ᐃᓱᐊ ᑎᑭᓕᖅᑎᓪᓗᒍ, ᖃᓂᒌᒃᑐᒥ ᓱᒃᑲᓴᐅᑎᓂᖃᓚᐅᖅᐳᖅ ᐅᔪᕈᒥᓂᒃ ᔫᐃᒥᑦ ᐃᓂᒋᔭᐅᔪᒥᑦ ᓱᒃᑲᓂᖅᐹᒥᑦ ᕿᒧᒃᓯᖅᑎᐅᔪᓂᑦ ᐃᒡᓗᓕᖕᒥᙶᖅᑐᒥᑦ.

ᔫᐃ ᐊᕿᐊᕈᖅ
 

ᐃᒡᓗᓕᒃ
 

ᔫᐃ ᓯᕗᓪᓕᖅᐹᒥ ᓱᒃᑲᓴᐅᑎᖃᑕᐅᓚᐅᖅᐳᖅ ᑐᕌᒐᒃᓴᒥᑦ 17-ᓂᒃ ᐊᕐᕌᒍᖃᖅᑎᓪᓗᒍ, ᑕᐃᔅᓱᒪᓂ ᐊᕐᕌᒎᔪᒥ, ᓯᓂᒃᑎᓪᓗᒍ ᖃᒧᑎᒥᓂᒃ ᐃᑳᓚᐅᖅᐳᖅ ᐃᓱᖓᓂ ᓱᒃᑲᓴᐅᑎᓂᕐᒧᑦ. ᐊᑖᑕᒌᒃ ᔪᐊᓇᓯᓗ ᐊᒥᖅᑳᓲᖑᕗᑦ ᕿᒧᒃᓯᐅᔾᔪᐊᖅᖢᑎᒃ ᓱᒃᑲᔪᐊᓗᖕᒥᑦ ᕿᒧᒃᓯᖅᑎᖏᓐᓂᑦ ᐃᒡᓗᓕᖕᒥᑦ.

ᑕᐃᕕᑦ ᐃᒃᑲᕐᕆᐊᓗᒃ
 

ᑲᖏᖅᖢᒑᐱᒃ
 

ᑕᐃᕕᑦ ᐃᒃᑲᕐᕆᐊᓗᒃ ᐱᕈᖅᓴᓚᐅᖅᐳᖅ “ᓄᓇᒥ” ᕿᒧᒃᓯᖅᑎᐅᖃᑎᒥᓂᒃ ᕋᐃᒡᒋᓕᒥᑦ ᐊᒻᒪᓗ ᔪᐃᓕᒥᑦ, ᐊᒻᒪᓗ ᑕᐃᒪᙵᑦ ᐱᖃᓐᓂᖅᑐᒥᑦ ᓵᓚᖃᖃᑦᑕᐅᑎᒌᒐᓱᒃᓯᒪᕗᑦ, ᑕᐃᕕᑦ ᐊᓕᐊᓇᐃᒍᓱᓚᐅᖅᐳᖅ ᐃᓱᓕᑦᑎᓂᕐᒥᑦ ᑲᑎᒪᔨᐅᓂᕐᒧᑦ ᕿᒧᒃᓯᐅᔾᔪᐊᕈᓐᓇᖅᓯᒃᑲᓐᓂᓚᐅᕐᒪᑦ.

ᔪᐃᓕ ᓴᖑᔭ
 

ᑲᖏᖅᖢᒑᐱᒃ
 

ᑕᒪᑐᒪᓂ ᐊᕐᕌᒎᔪᒥ ᓄᓇᕗᑦ ᑐᕌᒐᒃᓴᑦ ᓴᖑᔭᒃᑯᓐᓄᑦ ᐃᓚᒌᖕᓄᑦ ᐱᓕᕆᓂᐅᓚᐅᖅᐳᖅ ᑎᓴᒪᓂᒃ ᑭᖑᕚᕇᖕᓂᑦ ᐃᓚᒌᒃᑐᓂᑦ. ᐊᕐᕌᒍᒐᓴᓂᑦ ᕿᒧᒃᓯᖃᙱᖦᖢᓂ, ᔪᐃᓕᐅᑉ ᐊᓈᓇᖓ ᐊᑭᑦᑎᖅ ᑎᓕᐅᕆᓚᐅᖅᐳᖅ ᐅᑎᖅᑎᑦᑎᖁᔨᓪᓗᓂ ᐱᖅᑯᓯᐅᔪᒥᑦ. ᔪᐃᓕᐅᑉ ᑭᖑᓂᐊᒍᑦ, ᕿᒧᒃᓯᖅᑎᐅᓂᐊᖅᑐᖅ ᐃᕐᙳᑕᖓ ᔪᐊᑎᓐ.

ᒨᓯᓯ ᐆᔪᑯᓗᒃ
 

ᐃᒃᐱᐊᕐᔪᒃ
 

ᒨᓯᓯ ᐆᔪᑯᓗᒃ ᒪᐃᔭᐅᓚᐅᖅᑐᖅ ᐃᒃᐱᐊᕐᔪᖕᒥᑦ ᑲᑎᙵᔪᓂᒃ ᕿᒻᒥᖃᖅᑎᐅᔪᓂᑦ ᑕᐃᑲᓂ ᐋᖅᑭᓱᐃᓂᐊᕐᓂᕐᒧᑦ ᐱᓕᕆᔪᒪᓕᓚᐅᖅᑐᑦ ᓯᕗᓪᓕᖅᐹᒥ ᑐᕌᒐᒃᓴᒥᑦ 1999-ᖑᑎᓪᓗᒍ. ᐅᒡᒍᕆᕚ ᐊᕐᕌᒍᓂ, ᑭᓯᐊᓂ ᓱᓕ ᒨᓯᓯ ᐃᖃᙱᑦᑐᐊᓘᕗᖅ, ᓱᒃᑲᓪᓗᓂ ᕿᒧᒃᓯᖅᑎᐅᕗᖅ.

ᓖ ᐃᓄᐊᕋᖅ
 

ᒥᑦᑎᒪᑕᓕᒃ
 

 

ᐃᓄᐊᕋᒃᑯᑦ ᐃᓚᒌᑦ ᐃᓚᒋᔭᐅᙱᓐᓇᓲᖑᕗᑦ ᑐᕌᒐᒃᓴᒥᑦ. ᐊᑖᑕᖓ ᓴᕐᓕ ᐅᖃᐃᓐᓇᓲᖑᕗᖅ ᐃᕐᓂᖏᑦ ᓃᑰ ᐊᒻᒪᓗ ᓖ ᓵᓚᖃᕋᓱᐊᑦᑎᐊᖅᐳᑦ ᐊᖓᔪᒌᒃᖢᑎᒃ ᐱᑦᑎᐊᒻᒪᕆᐊᓗᒃᖢᑎᒃ ᑕᒪᑐᒪᓂ ᐊᕐᕌᒎᔪᒥ. ᐱᐅᕗᖅ, ᓖ ᓵᓚᖃᓚᐅᕐᒪᑦ ᓃᑰᒥᑦ ᐊᑕᐅᓯᑐᐊᕐᒥᑦ ᒥᓂᑦᒥᑦ ᐃᑲᕐᕋᐃᑦ 40 ᐅᖓᑖᓂ ᑲᑎᖦᖢᒋᑦ ᐃᒡᓕᓂᐅᔪᒦᖦᖢᑎᒃ!