Nunavut Quest

ᓄᓇᕗᑦ ᑐᕌᒐᒃᓴᑦ
 


ᐊᔾᔨᓕᐅᖅᑕᐅᔪᖅ: ᕼᐅ ᐅᐊᐃᒍᒡ 


ᓄᓇᕗᑦ ᓄᓇᐅᕗᖅ ᐊᔾᔨᒌᙱᕈᓘᔭᖅᑐᓂ ᐊᒻᒪᓗ ᑲᔾᔮᕐᓇᖅᑐᒻᒪᕆᐊᓗᖕᒥᑦ ᓄᓇᖃᖅᐳᖅ. ᓇᐹᖅᑐᖃᙱᑦᑐᒥ ᓄᓇᐅᔪᒥᑦ ᕿᑭᖅᑖᓗᖕᒥᑦ, ᕿᒧᒃᓯᖅᑏᑦ ᐃᖏᕐᕋᓂᐊᖅᐳᑦ ᑰᑭᑦᑐᒃᑯᑦ ᑕᑖᖅᑐᓂᑦ ᐃᑎᔪᒥᑦ ᐊᕿᑦᑐᒥᑦ ᐊᐳᒻᒥ ᐊᒻᒪᓗ ᐊᓂᒍᕐᓗᑎᒃ ᑕᑭᔪᑯᑖᓂᑦ ᑰᒍᕐᓂᑦ ᐊᕙᓗᓯᒪᔪᓂᑦ ᐊᒃᓴᑳᔪᓂᑦ ᖃᓕᕈᓯᕐᓂᑦ. ᑕᐃᒪᒃᑲᓐᓂᐅᖃᑦᑕᕐᓂᐊᖅᑐᖅ, ᐃᖏᕐᕋᕗᑦ ᒪᑐᐃᖓᔪᒥᑦ ᓇᐹᖅᑐᖃᕈᓐᓇᙱᑦᑐᒥᑦ ᐅᕝᕙᓘᓐᓃᑦ ᑕᕆᐅᕐᒥᑦ ᓯᑯᒥᑦ ᐃᓱᖃᖅᑰᔨᙱᑦᑐᒥᑦ ᖃᑯᕐᓂᐅᔪᓂᑦ ᓯᓚᒥᑦ. ᑕᕆᐅᕐᒥᑦ ᓯᑯᒥᑦ, ᒥᑭᑦᑐᑯᓘᖅᑰᔨᓲᖑᕗᑦ ᐳᖅᑐᔪᐊᓗᖕᓂᑦ ᐃᓐᓈᕈᕐᓂᑦ ᐊᒻᒪᓗ ᐱᐅᔪᒻᒪᕆᐊᓗᖕᓂᑦ ᐱᖃᓗᔭᕐᓂᑦ. ᑭᓛᒥᑐᒐᓚᖕᓂᑦ ᐃᖏᕐᕋᓂᐊᖅᐳᑦ ᐸᖕᒥᐅᖅᑐᓂᑦ ᓯᑯᑐᖃᕐᓂᑦ ᓯᒡᔭᒃᑯᑦ, ᓇᐅᑦᑎᖅᓱᐃᓐᓇᐅᔭᕐᓗᑎᒃ ᓇᓄᕐᓂᑦ ᐃᑲᕐᕋᑲᓴᖕᓂᑦ 24-ᓂᑦ ᖃᐅᒪᓂᐅᔪᒥᑦ. ᐊᕐᕌᒍᑕᒫᑦ, ᕿᒧᒃᓯᖅᑏᑦ ᐃᖏᕐᕋᓲᖑᕗᑦ 500 ᑭᓛᒥᑐᐸᓗᖕᓂᑦ ᑕᐃᑲᙵᑦ ᓇᓗᓇᐃᖅᑕᐅᓯᒪᔪᓂᑦ ᐅᖓᓯᒃᑐᓂᑦ ᓄᓇᓕᐅᔪᓂᑦ ᓄᓇᕗᒻᒥ.
 


ᐊᔾᔨᓕᐅᖅᑕᐅᔪᖅ: ᒪᐃᒃ ᔭᐃᐴᑎ



ᐃᓱᓕᕝᕕᐊ ᓇᓗᓇᐃᖅᑕᐅᓯᒪᒐᔪᒃᐳᑦ ᐊᐅᐸᖅᑐᓂᑦ ᐅᖅᓱᖃᐅᑎᐅᔪᓂᑦ ᐃᓕᓯᒪᔪᒥᑦ ᐊᐳᒻᒥ ᓯᑭᑑᑉ ᖃᓂᒋᔮᓂ. ᑕᐃᑲᓂ ᖃᐅᔨᓴᐅᒻᒥ ᓇᐅᑦᑎᖅᓱᖅᑎ ᐅᑕᖅᑭᕗᖅ ᑎᑎᕋᕐᓂᐊᕐᒪᑦ ᖃᔅᓯᒥ ᑎᑭᒻᒪᖔᑦ ᕿᒧᒃᓯᖅᑐᑦ ᑎᑭᑉᐸᓪᓕᐊᔪᓂᑦ. ᐃᓱᓕᕝᕕᐊ ᐃᓕᔭᐅᓯᒪᕗᖅ ᐅᖓᓯᒋᐸᓗᒃᑖᓂ ᑕᖕᒫᕐᕕᐅᓂᐊᖅᑐᒥᑦ ᕿᒻᒦᑦ ᓱᒃᑲᐃᒡᓕᒋᐊᔾᔮᙱᒻᒪᑕ ᐊᒻᒪᓗ ᓄᖅᑲᖅᓵᓕᔾᔮᙱᒻᒪᑕ. ᕿᒧᒃᓯᖅᑏᑦ ᐊᐅᓪᓚᖅᐸᒃᑲᓗᐊᖅᑎᓪᓗᒋᑦ ᐅᓪᓛᕐᔪᐊᒃᑯᑦ, 1 ᒥᓂᑦᒥᑦ ᐅᖓᓯᒌᒃᑕᖅᖢᑎᒃ, ᑎᑭᓐᓂᕆᔭᖏᑦ ᓄᑖᕐᒧᑦ ᑕᖕᒫᕐᕕᒃᓴᒧᑦ ᐊᕕᒃᑐᖅᓯᒪᔪᓐᓇᖅᐳᑦ ᐃᑲᕐᕋᑦ 10 ᐅᖓᑖᓄᑦ. ᑖᒃᑯᐊ ᑎᑭᑉᐸᓪᓕᐊᓂᖏᑦ ᐃᑲᕐᕋᖏᑦ ᖃᐅᔨᒋᐊᕈᑕᐅᕗᑦ ᐋᖅᑭᒃᑕᐅᓯᒪᓂᖏᓐᓂᑦ ᖃᐅᑎᓪᓗᒍ ᓱᒃᑲᓕᓂᖅᐹᖅ ᓯᕗᓪᓕᐅᓪᓗᓂ ᐊᐅᓪᓚᖅᖢᓂ. ᐅᓪᓗᖓᓂ ᑭᖑᓪᓕᖅᐹᒥ, ᐊᑕᐅᑦᑎᒃᑯᑦ ᐃᖏᕐᕋᓯᒋᐊᓲᑦ.
 


ᐊᔾᔨᓕᐅᖅᑕᐅᔪᖅ: ᑕᐃᕕᑦ ᐳᐊᓯ


ᓱᒃᑲᓴᐅᑎᓂᕐᒧᑦ ᒪᓕᒐᐃᑦ ᐊᒻᒪᓗ ᐊᑐᕆᐊᖃᖅᑕᖏᑦ ᐊᕐᕌᒎᓂᐊᖅᑐᒧᑦ ᐋᖅᑭᒃᑕᐅᓲᖑᕗᑦ ᕿᒧᒃᓯᖅᑎᐅᔪᓄᑦ ᐊᒻᒪᓗ ᓱᒃᑲᓴᐅᑎᓂᕐᒧᑦ ᑲᑎᒪᔨᕋᓛᖑᔪᓂᑦ ᑲᑎᒪᑎᓪᓗᒋᑦ ᓱᒃᑲᓴᐅᑎᓂᐅᑉ ᐃᓱᐊᓂ. 1999-ᒥ, ᑎᓴᒪᓂᒃ ᒪᓕᒐᖃᓚᐅᖅᐳᑦ. ᐱᕈᖅᓯᒪᓕᖅᐳᑦ 32-ᒧᑦ.
 


ᐊᔾᔨᓕᐅᖅᑕᐅᔪᖅ: ᓴᐃᒪᓐ ᐴᔫᓪᑦ

 

ᓄᓇᕗᑦ ᑐᕌᒐᒃᓴᑦ ᐊᔾᔨᐅᙱᓚᖅ. ᑐᕌᖓᓂᖃᖅᐳᖅ ᕿᒥᒃᓯᕐᓂᑐᐃᓐᓇᐅᙱᑦᑐᒥᑦ ᑭᓯᐊᓂᑦᑕᐅᖅ ᐱᖅᑯᓯᐅᔪᓂᑦ, ᐱᖁᑎᓂᑦ ᐊᒻᒪᓗ ᐃᓕᖅᑯᓯᓂᑦ ᐃᓄᖕᓂᑦ. ᖁᕕᐊᓱᒍᑎᖃᖅᐳᖅ ᑕᐃᔅᓱᒪᓂ ᕿᒧᒃᓯᒃᑯᑦ ᐃᖏᕐᕋᕙᒃᑎᓪᓗᒋᑦ ᐃᓅᓯᕆᔭᐅᑎᓪᓗᒍ ᐊᒻᒪᓗ ᐃᖅᑲᐃᑎᑦᑎᓲᖑᓪᓗᓂ ᐃᖅᓯᑐᐃᓐᓂᕐᓂᐅᔪᓂᑦ, ᕿᓄᐃᓵᕐᓂᕐᒥᑦ ᐊᒻᒪᓗ ᐊᒃᓱᕈᒃᑲᐅᓂᖏᓐᓂᑦ ᐃᓄᖕᓂᑦ ᐊᓐᓂᑐᖅᑐᓂᑦ ᐊᒻᒪᓗ ᐆᒪᒃᑳᓘᓚᐅᕐᓂᖏᓐᓂᑦ ᑕᐃᔅᓱᒪᓂᑐᖄᓗᒃ. ᐊᔾᔨᒋᙱᑕᖓᓕ ᐊᓯᖏᓐᓂᑦ ᕿᒧᒃᓯᐅᑎᔪᓂᑦ, 
ᓄᓇᕗᑦ ᑐᕌᒐᒃᓴᑦ ᐊᐅᓚᑕᐅᓲᖑᕗᖅ ᐅᖓᓯᒌᒃᑕᖅᑐᓂᑦ ᓄᓇᓕᖕᓂᑦ. ᐱᑕᖃᙱᓚᖅ ᓇᓗᓇᖅᑐᐊᓗᖕᓂᑦ ᐃᑲᔪᕈᓯᐅᔪᓂᑦ, ᐅᖅᑯᐊᖃᙱᖦᖢᑎᒃ ᐃᓕᓯᒪᔪᓂᑦ ᓄᓇᒥᑦ ᐃᓄᖕᓄᑦ ᕿᒻᒥᕐᓄᓪᓘᓐᓃᑦ, ᕼᐊᓚᑳᑉᑐᖃᕋᑎᒃ, ᐋᖅᑭᒃᓯᒪᔪᓂᒃ ᐃᒡᓕᓂᖃᕋᑎᒃ, ᓇᓗᓇᐃᒃᑯᑕᖃᕋᑎᒃ ᐊᒻᒪᓗ ᓂᕐᔪᑎᓕᕆᔨᑕᖃᕋᓂ ᐋᓐᓂᐊᓯᐅᑎᓂᒡᓘᓐᓃᑦ. ᓯᕗᓪᓕᕐᓂᑦ ᐊᕐᕌᒍᓂ 10-ᓂ, ᐅᖃᖃᑎᐅᓚᐅᖅᑐᑦ ᒥᑭᑦᑐᑦ ᐊᐅᐸᓗᒃᑐᑦ ᐆᕚᕈᑎᓂᑦ. ᒫᓐᓇ ᖃᖓᑦᑕᖅᑎᑕᐅᓯᒪᔪᓂᑦ ᐅᖄᓚᐅᑎᖃᒐᓛᓲᖑᓕᖅᑐᑦ ᓇᒃᓴᖅᑕᐅᔪᓂᑦ ᐃᓚᖏᓐᓂᑦ ᐃᑲᔪᖅᓱᐃᔪᓂᑦ ᐱᓕᕆᔨᐅᔪᓂᑦ.


ᐊᔾᔨᓕᐅᖅᑕᐅᔪᖅ: ᕼᐅ ᐊᐃᒍᔅ


ᑕᒪᓐᓇ ᓱᒃᑲᓴᕐᓂᐅᔪᖅ ᐅᓗᕆᐊᓇᖅᑐᒥ ᒪᓕᒃᑕᐅᖏᓐᓇᖅᐳᖅ ᐅᓗᕆᐊᓇᖅᑐᒥ ᐊᐳᒻᒥ ᐊᒻᒪᓗ ᓯᑯᑦᑎᐊᕙᐅᙱᑦᑐᒥᑦ, ᓂᒡᓚᓱᒡᔪᐊᖅᑐᒥ, ᓇᓗᓇᑦᑎᐊᖅᑐᒥ ᐊᒻᒪᓗ ᐱᕐᔪᐊᖅᑐᒥ ᐅᑭᐅᖅᑕᖅᑐᒥ ᓯᓚᐅᔪᒥᑦ ᐊᒻᒪᓗ ᐅᓗᕆᐊᓇᕐᓂᐅᔪᒥᑦ ᓇᓄᕐᓂᑦ. ᕿᒧᒃᓯᖅᑏᑦ ᐃᒥᓐᓂ ᐊᔪᙱᓐᓂᖃᕆᐊᖃᑦᑎᐊᖅᐳᑦ ᐊᒻᒪᓗ ᐸᕐᓇᒃᓯᒪᓗᑎᒃ ᖃᓄᑐᐃᓐᓇᑦᑎᐊᖅ ᑐᐊᕕᕐᓇᐅᔪᓂᑦ. ᓴᕕᒃᑯᕕᖃᕆᐊᖃᖅᐳᑦ ᖃᒧᑎᒥᑦ ᐃᓗᓕᓕᖕᒥᑦ ᑕᖕᒫᖅᑐᖅᓯᐅᑎᒥᑦ ᕿᐱᕐᔪᐊᒥᑦ, ᐊᐳᒻᒧᑦ ᑭᓪᓘᑎᒥᑦ ᐊᒻᒪᓗ ᓴᕕᖕᒥᑦ (ᑐᐊᕕᕐᓇᖅᑐᒧᑦ ᐃᒡᓗᓕᔾᔪᑎᒃᓴᒥᑦ), ᒪᕐᕉᖕᓂᑦ ᐃᒐᓕᖕᓂᑦ ᓱᐴᔪᕐᒥᑦ, ᓂᕿᓂᒃ ᐊᒻᒪᓗ ᖁᑭᐅᑎᒥᑦ.
 


ᐊᔾᔨᓕᐅᖅᑕᐅᔪᖅ: ᓴᐃᒪᓐ ᐴᔫᓪᑦ



ᐱᖅᑯᓯᑐᖃᒃᑯᑦ ᖃᒧᑎᒃ, ᖃᒧᑎᐅᔪᑦ, ᓴᓇᔭᐅᕙᓚᐅᖅᐳᖅ ᓴᐅᓂᕐᓂᑦ ᕿᓚᒃᓱᐃᓪᓗᑎᒃ, ᐊᑐᖅᖢᑎᒃ ᐊᒃᖢᓈᓂᒃ ᓴᓇᓯᒪᔪᓂᑦ ᐅᒡᔫᑉ ᕿᓯᖓᓂ. ᖁᐊᖅᑎᓯᒪᔪᑦ ᐃᖃᓗᐃᑦ ᐃᓕᔭᐅᓪᓗᑎᒃ ᑐᑭᓕᐊᖅᑐᒥ ᐅᕝᕙᓘᓐᓃᑦ ᐊᐃᕕᐅᑉ ᑲᐅᖓᓂ ᐊᓱᐃᓛᒃ ᐃᒻᒧᓯᖅᑕᐅᓪᓗᑎᒃ ᓴᓇᓪᓗᑎᒃ ᐱᑉᕌᒃᓴᓂᒃ. ᓵᑦᑐᒥᑦ ᐃᔾᔪᕐᒥᑦ ᓄᓇᒥᑦ ᐃᓕᓯᓪᓗᑎᒃ ᐊᑖᒍᑦ ᐱᕐᕌᖑᔪᓂᑦ ᐊᒻᒪᓗ ᐊᐅᒃᑎᑕᐅᓯᒪᔪᒥᑦ ᐊᐳᒻᒥ, ᐊᐅᖕᒥᑦ ᐅᕝᕙᓘᓐᓃᑦ ᖁᐃᒥᑦ ᐃᓪᓕᕆᔭᐅᓪᓗᓂ ᖃᓕᕇᒃᐸᓪᓕᐊᔪᓂᑦ ᐊᒻᒪᓗ ᖁᐊᖅᓯᐊᖑᓕᖅᖢᓂ ᐃᓪᓕᕆᒃᑲᓐᓂᓚᐅᙱᑎᓪᓗᒋᑦ. ᒫᓐᓇᐅᔪᖅ, ᖃᒧᑏᑦ ᓴᓇᓯᒪᓕᖅᑐᑦ ᕿᔪᖕᒥᑦ ᑭᓯᐊᓂ ᓱᓕ ᓇᕿᑕᕆᔭᐅᓲᑦ ᕿᓯᖕᒧᑦ ᐅᕝᕙᓘᓐᓃᑦ ᓇᐃᓛᓐᒥ ᓴᓇᓯᒪᔪᓂᑦ ᐊᒃᖢᓈᓂᒃ. ᑭᑭᐊᖕᓂᑦ ᐊᑐᓲᖑᙱᓚᑦ. ᐊᒃᖢᓈᑦ ᖃᒧᑎᓂᑦ ᓴᖑᔪᓐᓇᖅᑎᑦᑎᓲᖑᕗᑦ ᓱᕋᒐᑎᒃ ᐃᖏᕐᕋᑎᓪᓗᒍ ᒪᓂᕋᐅᙱᑦᑐᒥ ᓄᓇᒥ. ᐊᒥᓱᐃᖅ ᕿᒧᒃᓯᖅᑏᑦ ᓱᓕ ᐊᑐᓲᖑᕗᑦ ᐱᖅᑯᓯᑐᖃᐅᔪᓂᑦ ᐱᕐᕌᓂᒃ ᓯᓚ ᒪᓕᒡᓗᒍ.
 


ᐊᔾᔨᓕᐅᖅᑕᐅᔪᖅ: ᓴᐃᒪᓐ ᐴᔫᓪᑦ


ᕿᒻᒦᑦ ᐸᖓᓕᒃᑎᑕᐅᓲᖑᕗᑦ ᐃᖅᐸᑐᕐᒥᑦ ᓴᓐᓂᕆᐊᓕᕐᒥᑦ ᐱᔪᓐᓇᖅᑎᑦᑎᓪᓗᓂ ᕿᒻᒥᓂᒃ ᐃᖏᕐᕋᓂᕐᒧᑦ ᓇᐅᒃᑯᑐᐃᓐᓇᖅ ᓯᑯᕐᓘᑎᓂᐅᔪᓂᑦ. ᐊᓄᓕᒫᑦ, ᐃᐸᕋᐅᑏᑦ ᐊᒻᒪᓗ ᐳᑦᓯᐅᑏᑦ ᓴᓇᐅᒐᐅᔭᕆᐊᖃᖅᐳᑦ ᐊᒡᒐᒧᑦ.
 


ᐊᔾᔨᓕᐅᖅᑕᐅᔪᖅ: ᑕᐃᕕᑦ ᐳᐊᓯ


ᐃᑲᔪᖅᓱᐃᔪᑦ ᐱᓕᕆᔨᐅᔪᑦ ᐃᖏᕐᕋᓲᖑᕗᑦ ᓯᑭᑑᒃᑯᑦ ᐊᒻᒪᓗ ᐋᖅᑭᒃᓱᐃᓲᖑᕗᑦ ᖃᐅᑕᒫᑦ ᑕᖕᒫᕐᕕᐅᓂᐊᖅᑐᓂᑦ. ᑏᑐᕐᓇᖅᓯᔭᕌᖓᑦ ᐃᒡᓕᓂᕐᒥᑦ, ᐃᓂᒋᔭᐅᔪᑦ ᐊᖑᓇᓱᑦᑎᐊᕕᓂᑦ ᐅᕝᕙᓘᓐᓃᑦ ᐅᒃᐱᕐᓂᓕᕆᓂᕐᒥᑦ ᐊᑑᑎᓕᖕᓂᑦ ᐅᖃᐅᓯᐅᕗᑦ ᐊᒻᒪᓗ ᐅᓂᒃᑳᖅᑐᐊᖅᐸᒃᖢᑎᒃ ᓱᕈᓯᐅᑎᓪᓗᒋᑦ ᑕᖕᒫᕐᕕᒋᕙᓚᐅᖅᑕᖏᓐᓂᑦ, ᐃᓅᕝᕕᕕᓂᖏᓐᓂᑦ ᐊᒻᒪᓗ ᓇᒡᓕᒋᔭᒥᓂᑦ ᐃᓅᔪᓐᓃᖅᓯᒪᔪᓂᑦ. ᒪᒥᓴᕐᓂᖃᒐᔪᓲᖑᕗᑦ ᑕᖕᒫᕐᕕᒋᔭᒥᓂᑦ. ᕿᒧᒃᓯᖅᑏᑦ ᐅᖃᐅᓯᖃᓲᖑᕗᑦ ᐃᓕᓐᓂᐊᕐᓂᕆᓯᒪᔭᖏᓐᓂᑦ ᐊᒻᒪᓗ ᕿᒥᕆᔾᔪᓯᒥᓂᑦ ᐊᒻᒪᓗ ᓱᒃᑲᓴᐅᑎᐊᓂᒃᑎᓪᓗᒋᑦ, ᕿᒻᒦᑦ ᑕᐅᖅᓰᔭᐅᓲᖑᕗᑦ ᓄᓇᓕᖕᓂᑦ ᓴᙱᒃᑎᑦᑎᓇᓱᐊᒧᑦ ᐃᓗᑦᓯᕈᑎᖏᓐᓂᑦ ᓄᑖᒥᑦ ᐊᐅᖃᕐᓂᐅᔪᒥᑦ ᕿᒻᒥᓂᑦ.
 


ᐊᔾᔨᓕᐅᖅᑕᐅᔪᖅ: ᕼᐅ ᐊᐃᒍᔅ


ᐱᒋᐊᕐᕕᒋᓂᐊᖅᑕᖓᓅᕋᓱᐊᕐᓂᑦ ᓱᒃᑲᓴᐅᑎᓂᕐᒧᑦ ᕿᒧᒃᓯᕐᓗᓂ ᐊᖏᕐᕋᒥ ᐅᕝᕙᓘᓐᓃᑦ ᑲᓕᓪᓗᒋᑦ ᕿᒻᒦᑦ ᖃᒧᑎᒃᑯᑦ ᑕᐃᒪᐃᓐᓂᖓᓄᑦ ᕿᒧᒃᓯᖅᑏᑦ ᐃᖏᕐᕋᓯᒪᖃᑦᑕᕐᓂᐊᖅᐳᑦ 500 ᑭᓛᒥᑐ ᐅᖓᑖᓂ ᐱᒋᐊᓚᐅᙱᓐᓂᖏᓐᓂᑦ ᓱᒃᑲᓴᐅᑎᓂᕐᒧᑦ. ᓯᓚᑦᑎᐊᕙᐅᙱᑦᑐᒧᑦ ᑭᖑᕙᕆᐊᖅᑎᑦᑎᒐᔪᒃᐳᖅ ᐱᒋᐊᕐᕕᒋᓂᐊᖅᑕᒥᓂᑦ.