Story

ᐅᓂᒃᑳᖅᑐᐊᖅ - ᒥᑭᓛᖑᔪᖅ ᕿᒻᒥᐊᕐᔪᒃᑖᕆᔭᐅᔪᓂᒃ
 

ᑎᑎᕋᖅᑕᐅᔪᖅ ᐹᓖᓐ ᔅᑳᑦᒧᑦ
 

 

ᐊᖏᔪᐊᓗᐃᑦ, ᐃᓱᖅᑕᑦ, ᐱᖅᓯᒃᓴᑦ ᓄᕗᔭᐃᑦ ᑖᖅᓯᑎᑦᑎᕗᖅ ᓂᒋᕐᒥᑦ ᐊᒻᒪᓗ ᐊᓄᕆ ᐅᖅᑰᓂᖅᓴᐅᓪᓗᓂ ᑭᓯᐊᓂ ᓴᙱᓂᖅᓴᐅᓪᓗᓂ. ᐸᐅᓗᓯᐅᑉ ᐆᒻᒪᑎᖓ ᑲᑕᒃᐳᖅ ᐊᒻᒪᓗ ᐃᒃᐱᒋᔪᓐᓇᖅᖢᓂᐅᒃ ᓯᕗᓪᓖᑦ ᑲᑉᐱᐊᓱᖕᓂᐅᔪᓂᑦ ᐱᕈᖅᐸᓪᓕᐊᔪᓂ ᐃᓗᖓᓂ. ᒥᕆᐊᕐᓂᐊᖅᑑᔮᖅᖢᓂ.ᕿᒧᒃᓯᖏᑦ ᐸᖓᓕᒃᑎᖅᑲᐅᓪᓗᓂᒋᑦ ᐊᔪᕈᓐᓃᖅᓴᖅᑎᖦᖢᓂᒋᑦ ᐊᑖᑕᑦᑎᐊᒥᓄᑦ, ᔪᐊᑕᒥ ᓄᕙᓗᐊᕐᒪᑦ.  ᕿᒧᒃᓰᑦ ᐊᔪᕈᓐᓃᖅᓴᕆᐊᖃᒻᒪᕆᒃᐳᑦ ᓱᒃᑲᓴᐅᑎᓚᐅᙱᓐᓂᖏᓐᓂᑦ– ᓄᓇᕗᑦ ᑐᕌᒐᒃᓴᒥᑦ. ᑕᒪᑐᒪᓂ ᐊᕐᕌᒎᔪᒥ ᕿᒧᒃᓯᐅᕐᔪᐊᕐᓂᖅ ᓱᒃᑲᓴᐅᑎᓂᖅ ᒥᑦᑎᒪᑕᓕᖕᒥᑦ ᐱᒋᐊᕐᓂᐊᖅᐳᖅ ᐊᒻᒪᓗ ᐊᖏᕐᕋᖓᓄᑦ ᐅᑎᕐᓂᐊᖅᖢᑎᒃ ᑲᖏᖅᖢᒑᐱᖕᒧᑦ.
 
 

ᐸᐅᓗᓯ 11-ᓂ ᐊᕐᕌᒍᖃᓕᕐᒪᑦ, ᐊᑖᑕᑦᑎᐊᖓᑕ ᐸᖅᑭᔪᓐᓇᕐᓂᖓ ᕿᒧᒃᓯᖏᓐᓂᑦ  ᖃᐅᔨᒪᓕᖅᐸᐅᒃ. ᐊᐅᓪᓚᓚᐅᖅᐳᖅ ᐅᓪᓛᒻᒪᕆᐊᓗᒃᑯᑦ ᐅᓪᓗᓕᒫᕐᓂᐊᕋᒥ, ᐊᒻᒪᓗ ᕿᒧᒃᓰᑦ ᐸᖓᓕᑦᑎᐊᕈᓐᓇᕐᓂᐊᕐᒪᑕ. ᐸᐅᓗᓯ ᐊᓕᐊᓇᐃᒍᓱᒃᐳᖅ ᕿᒻᒥᓂ ᓇᒃᓴᓚᐅᕋᒥᐅᒃ, ᐆᒻᒪᑎᖅᑯᖅᑐᔪᖅ, ᕿᒧᒃᓯᖅᑎᐅᖃᑕᐅᙱᒃᑲᓗᐊᖅᖢᓂ. ᐊᑖᑕᑦᑎᐊᖓᑕ ᐅᖃᐅᑎᓚᐅᖅᐸᖓ, ᐆᒻᒪᑎᖅᑯᖅᑐᔪᖅ ᓱᓕ ᒥᑭᓗᐊᕐᒪᑦ ᑐᕌᒐᒃᓴᓂ ᕿᒥᒃᓯᖅᑎᐅᔪᓂᑦ ᓱᒃᑲᓴᐅᑎᖃᑕᐅᔭᕆᐊᒃᓴᖅ. ᐆᒻᒪᑎᕐᔪᐊᖅ ᒥᑭᓛᖑᓚᐅᖅᐳᖅ ᕿᒻᒥᐊᕐᔪᒃᑖᕆᔭᐅᓚᐅᖅᑐᓂ, ᑭᓯᐊᓂ ᐸᐅᓗᓯ ᐊᐱᕇᓐᓈᓗᓚᐅᕐᓂᖓᓄᑦ, ᔪᐊᑕᒥᐅᑉ ᐱᑖᕆᑎᓚᐅᖅᐸᖓ ᕿᒻᒥᖅ. ᕿᒻᒥᕐᓗ ᐊᖑᑎᓗ ᓇᒧᙵᐅᖃᑎᒌᖏᓐᓇᓚᐅᖅᐳᑦ – ᑭᓯᐊᓂ ᐃᓕᓐᓂᐊᕐᕕᖕᒧᑦ.
 

 

ᐸᐅᓗᓯ ᐃᓱᒪᓚᐅᖅᐳᖅ ᐱᖅᓯᖅ ᑎᑭᓚᐅᙱᓐᓂᖓᓂ ᕿᒪᒍᓐᓇᖅᑕᖓ ᐃᑲᕐᕋᐅᖅᑲᐅᔪᒥᑦ, ᑭᓯᐊᓂ ᒫᓐᓇ ᖃᐅᔨᒪᓕᖅᐳᖅ ᓄᖅᑲᕆᐊᖃᕐᓂᖓᓂ ᐊᒻᒪᓗ ᐅᖅᑯᐊᓕᐅᕆᐊᖃᕐᓂᖓᓂ. ᐃᖏᕐᕋᐃᓐᓇᕈᓐᓇᙱᑦᑐᑦ, ᐱᖅᓯᖅ ᑕᑯᒃᓴᐅᑎᑦᑎᔾᔮᙱᒻᒪᑦ ᐅᐸᒐᓱᐊᖅᑕᒥᓂᑦ. ᐅᓪᓘᑉ ᓇᑉᐸᓪᓗᐊᖓᓂ ᕿᒧᒃᓯᖅᑲᐅᔭᖓᑕ ᐊᖏᕐᕋᒥ ᐅᖓᓯᖕᓂᖃᖅᐳᑦ.
 ᔪᐊᑕᒥᐅᑉ ᐃᓕᓐᓂᐊᖅᑎᓚᐅᖅᐸᖓ ᐃᖏᕐᕋᐃᓐᓇᕆᐊᖃᖏᓐᓂᖏᓐᓂᑦ ᐱᖅᓯᒥᑦ, ᑕᐃᒫᒃ ᐃᓄᐃᑦ ᐊᓯᐅᔪᓐᓇᖅᐳᑦ ᐊᒻᒪᓗ ᑐᖁᓗᑎᒃ. ᕿᒥᒃᓯᖏᑦ ᑲᑉᐱᐊᓱᒃᑑᔮᖅᐳᑦ, ᐃᒃᐱᒍᓱᖕᒥᖕᒪᑕ ᐅᓗᕆᐊᓇᖅᑐᒦᓐᓂᖏᓐᓂᑦ.

 
ᐸᐅᓗᓯ ᓄᖅᑲᖅᑎᑉᐸᖏᑦ ᕿᒧᒃᓯᖏᑦ ᐊᒻᒪᓗ ᐃᐱᖅᑐᖅᐸᖏᑦ ᐊᓄᕆᒧᑦ ᑐᓄᙵᑎᖦᖢᓂᒋᑦ ᓵᙵᓪᓗᑎᒃ ᖃᒧᑎᒧᑦ (ᖃᒧᑎᖓᓐᓄᑦ) ᐊᒻᒪᓗ ᑐᓄᐊᓂ ᐅᖅᑯᐊᓕᑲᐅᖅᑐᕆᐊᖃᖅᐳᖅ. ᕿᒻᒦᑦ ᐊᑐᓂ ᐃᒋᑦᑎᕕᒋᑲᐅᖅᑐᖅᐸᖏᑦ ᐊᕕᒃᑐᖅᓯᒪᔪᓂᑦ ᐃᖃᓗᖕᓂᑦ ᓂᕆᓂᐊᖅᑕᖏᓐᓂᑦ ᐱᖅᓯᒥᑦ. ᐃᒥᕈᓕᕈᑎᒃ ᐊᐳᑎᑐᕐᓂᐊᖅᖢᑎᒃ.
 
 
ᐊᑖᑕᑦᑎᐊᖓᑕ ᐃᓕᓐᓂᐊᖅᑎᓚᐅᖅᓯᒪᕙᖓ ᐅᕕᖅᑎᑦᑎᓂᕐᒥᑦ ᖃᒧᑎᒥᑦ ᓴᓂᕋᖓᓄᑦ ᑭᓴᕈᑎᒋᓂᐊᕐᓗᓂᐅᒃ ᐅᖅᑯᐊᖓᓄᑦ  ᐊᓂᕆᒧᑦ ᓴᐳᔾᔪᑎᒃᓴᐅᓂᐊᖅᑐᒥᑦ. ᐸᐅᓗᓯ ᐊᐳᒻᒧᑦ ᓴᕕᒥᓂᑦ ᐊᓂᑦᑎᕗᖅ ᐊᒻᒪᓗ ᐲᔭᐃᓕᖅᐳᖅ ᐊᐳᒻᒥ ᐊᐅᕕᕐᓂᑦ ᐅᖅᑯᐊᒃᓴᐅᓂᐊᖅᑐᒧᑦ. ᓴᓂᕋᖓ ᓴᓇᑲᐅᖅᑐᖅᐹ, ᐱᐅᓕᐊᕌᓗᙱᑦᑐᑦ, ᑭᓯᐊᓂ ᖃᓄᐃᔾᔮᙱᑦᑐᑦ, ᑐᐱᒃᓴᒥᑦ ᐅᖅᑯᐊᓕᓂᕐᒥᑦ ᐊᑐᖅᐳᖅ ᖁᓕᒃᓴᖓᓄᑦ. ᓱᓕ ᐊᔪᓗᐊᒐᓚᖕᒪᑦ ᐃᒡᓗᕕᒐᒃᓴᒥᑦ ᐋᖅᑭᒃᓯᓂᕐᒥᑦ ᒪᒃᑲᕐᒥᑦ ᖁᓕᑦᑎᔭᕆᐊᒃᓴᖅ, ᔪᐊᑕᒥᐅᑉ ᐃᓕᓐᓂᐊᖅᑎᓚᐅᖅᓯᒪᕙᖓ ᐅᖅᑯᐊᓕᓂᕐᒥᑦ ᖁᓕᔾᔪᑎᒋᓗᓂᐅᒃ ᑐᐊᕕᕐᓇᖅᑐᒥ ᐅᖅᑯᐊᓕᐅᕐᓂᕐᒥᑦ. ᕿᓚᒃᖢᓂᐅᒃ ᐅᖅᑯᐊᓕᓂᖅ ᑐᐱᒃᓴᖅ ᖃᒧᑎᒧᑦ ᓴᓂᕌᓄᑦ ᐊᒻᒪᓗ ᐊᑐᖅᖢᓂ ᐊᐅᕕᕐᓂᑦ ᐊᐳᒻᒥ ᐊᑐᖅᖢᓂ ᐊᑦᑐᖏᖅᓯᓯᒪᓪᓗᓂ ᐃᒡᓗᖔᖓᓂ ᐊᑎᓕᒫᖓᓄᑦ ᐊᒻᒪᓗ ᐅᓕᒃᑲᓐᓂᖅᖢᓂᐅᒃ ᐊᐳᒻᒧᑦ ᐊᓄᕆᒧᑦ ᑎᒃᑕᐅᔭᔾᔮᙱᒻᒪᑦ ᐅᖅᑯᐊᓕᓂᖓ - ᑕᐃᒪᑐᖅ.

 


ᑎᑎᕋᖅᑕᐅᔪᖅ: ᐄᒍᐊ ᑐᕌᒍᔅᓛᕕᒃ - leaddog.ca


ᐅᖅᑯᐊᕐᒧᑦ ᐅᓂᐊᕌᓂᓵᖅᖢᓂᒋᑦ ᓱᐴᔫᖓ, ᓇᑦᑎᕐᒥᑦ ᓂᕿᒥᑦ, ᖃᑦᑕᕐᒥᑦ ᑏᓕᐅᕈᑎᒃᓴᒥᑦ ᐊᒻᒪᓗ ᕿᒻᒥᓂ, ᐱᖅᓯᓕᕐᔪᐊᖅᐳᖅ. ᓱᐴᔫᖓ ᐃᓕᓪᓗᓂᐅᒃ ᐊᖕᒪᔪᖃᕐᕕᖕᒧᑦ ᐊᒻᒪᓗ ᐆᓇᖅᑐᓕᐅᖅᖢᓂ ᑏᒃᓴᒧᑦ. ᖃᐅᔨᒪᓪᓗᓂ ᐃᒥᕆᐊᖃᕐᓂᐊᕐᓂᖓᓂ ᖁᐊᔾᔮᙱᒻᒪᑦ. ᐊᕕᒃᓯᓪᓗᓂ ᓇᑦᑎᕐᒥᑦ ᓴᕕᖓᓄᑦ – ᖁᐊᖑᒐᓗᐊᖅᖢᓂ ᕿᓚᒥᑯᓗᒃ ᐊᐅᒃᖢᓂ ᐅᖁᒻᒥᐊᖅᖢᓂᐅᒃ, ᓇᑦᑎᐅᑉ ᓂᕿᖓ ᐅᖅᑰᓯᑎᑦᑎᓲᖑᕗᖅ ᐃᓗᒻᒧᑦ ᐊᒻᒪᓗ ᐃᒃᐱᒋᓪᓗᓂᐅᒃ ᐆᓇᖅᓯᕙᓪᓕᐊᓂᖓ ᐄᓯᑎᓪᓗᒍ. ᐲᖅᓯᔾᔪᑎᕙᐅᒃ ᓇᑦᑎᕐᒥᑦ ᐆᒻᒪᑎᕐᔪᐊᒧᑦ. ᕿᒻᒥᖓ ᖃᓂᒋᔮᓄᑦ ᐃᒧᕗᖅ ᐱᖅᓯᖅᔪᐊᖅᑎᓪᓗᒍ ᓯᓚᒥ. ᓯᓂᓕᓕᑐᐊᕌᖓᒥ ᐆᒻᒪᑎᕐᔪᐊᑉ ᑐᐹᖅᐸᖓ ᐊᒻᒪᓗ ᖃᐅᔨᒋᐊᖅᐸᒃᖢᓂ ᐅᖅᑯᐊᖓ ᐋᖅᑭᑦᑎᐊᖅᓯᒪᒐᓗᐊᕐᒪᖔᑦ ᐱᖅᓯᒥᑦ.
 
 
ᐃᓚᓂ ᐃᓱᒪᒋᕙᖏᑦ. ᐊᓈᓇᖓ ᐊᒻᒪᓗ ᐊᑖᑕᑦᑎᐊᖓ ᐱᖏᒍᓱᒃᑲᔭᖅᑐᐃᑦ. ᐊᑖᑕᑦᑎᐊᖓ ᐃᓱᒪᓇᔭᖅᐳᖅ ᐃᖅᑲᐅᒪᓕᑐᖅᑕᐃᒪ ᑕᒪᕐᒥᒃ ᔪᐊᑕᒥᐅᑉ ᐃᓕᓐᓂᐊᖅᑎᓚᐅᖅᑕᖏᓐᓂᑦ. ᐊᓈᓇᖓ ᑲᑉᐱᐊᓱᒃᑲᔭᖅᑐᖅ ᐊᒃᓱᐊᓗᒃ. ᓇᔭᑯᓗᖏᑦ ᕿᐊᓇᔭᖅᑐᑦ. ᐅᓂᒃᑳᖅᑐᐊᕐᕕᒋᓲᖏᑦ ᓯᓂᓕᕋᓱᖕᓂᖏᓐᓂᒃ, ᐊᓈᓇᖓ ᐃᖅᑲᓇᐃᔭᕆᐊᖅᑐᖅᑎᓪᓗᒍ ᑯᐊᐸᒃᑯᓐᓂ ᐅᓐᓄᐊᒃᑯᑦ ᓴᓗᒻᒪᖅᓴᐃᔭᖅᑐᖅᑎᓪᓗᒍ ᐊᒻᒪᓗ ᖁᓕᕈᐊᓂᒃ ᐃᓗᓪᓕᖅᓴᐃᓗᓂ. ᓇᔭᖏᑦ ᖃᓄᐃᓐᓂᐊᖅᐸᑦ ᐅᓂᒃᑲᐅᑎᙱᒃᑯᓂᒋᑦ ᔅᐸᐃᑐᒫᓐᒥᑦ ᐊᒻᒪᓗ ᕼᐊᓪᒃᒥᑦ, ᐃᓕᓚᐅᖅᑕᖏᓐᓂᑦ ᑳᒥᒃᔅᓂᑦ?
 
 
ᓯᓂᓕᒃᑲᓐᓂᖅᐳᖅ. ᐆᒻᒪᑎᕐᔪᐊᖅ ᒧᒡᒍᓛᕐᕕᒋᕙᐅᒃ ᑮᓇᒥᓄᑦ. ᐅᖅᑯᐊᓕᓂᖅ ᐊᐅᓚᕐᔪᐊᖅᐳᑦ ᐊᓄᕆᒥᑦ, ᑎᒃᑕᐅᓕᒑᓕᖅᖢᓂ. ᐊᓂᔭᕆᐊᖃᖅᐳᖅ ᓱᑲᑎᒋᐊᒃᑲᓐᓂᕐᓗᓂᐅᒃ. ᐊᒃᓱᕉᓴᖅᖢᓂ ᐅᖅᑯᐊᑉ ᐹᖓᓂ ᐊᒻᒪᓗ ᐊᓱᐃᓛᒃ ᓱᑲᑎᑦᑎᐊᖅᖢᓂᐅᒃ ᐊᐳᒻᒧᑦ ᓴᐅᓪᓗᓂᒋᑦ ᐊᐅᕖᑦ, ᖁᑦᑎᒃᓯᕚᓪᓕᖅᖢᓂᐅᒃ ᐊᒻᒪᓗ ᐅᕿᙱᓕᖅᑎᒃᑲᓐᓂᖅᖢᓂᐅᒃ.  ᐊᔭᐃᑦᑎᐊᖅᑐᖅ. “ᖁᔭᓐᓇᒦᒃ” (ᖁᔭᓐᓇᒦᒃ) ᐆᒻᒪᑎᕐᔪᐊᖅ!
 
 
ᐅᓪᓚᙳᒃᑲᓐᓂᖅᐳᖅ ᐊᒻᒪᓗ ᐱᖅᓯᖅ ᖄᖏᐅᑎᕗᖅ. ᓴᓐᓂᕆᐊᖅ ᐋᖅᑭᒃᐸᖓ ᐃᖅᐸᑐᕐᒥᑦ ᓴᓐᓂᕆᐊᒥᑦ ᐊᑐᖅᑕᐅᓲᒥᑦ ᑲᓇᖕᓇᕐᒥ ᐅᑭᐅᖅᑕᖅᑐᒥ, ᑭᓯᐊᓂ ᐆᒻᒪᑎᕐᔪᐊᖅ ᐸᖓᓕᒃᑎᖦᖢᓂᐅᒃ ᓴᓐᓂᕆᐊᖅᓯᒪᓇᓂ. ᕿᒻᒥᖓ ᖃᐅᔨᒪᔪᒻᒪᕆᐊᓗᒃ; ᐃᑲᔪᕈᓐᓇᕐᓂᖅᓴᐅᓂᐊᖅᐳᖃᐃ ᓴᓐᓂᕆᐊᖅᓯᒪᓇᓂ ᖃᒧᑎᒧᑦ. ᐃᖏᕐᕋᑦᑎᐊᖅᑐᐊᓘᕗᑦ, ᐃᓛᓐᓂᒃᑯᑦ ᕿᒪᒃᑕᐅᓕᖅᐸᒃᖢᓂ ᖃᒧᑎᐅ ᑐᓄᐊᓄᑦ, ᐃᓛᓐᓂᒃᑯᑦ ᐃᑭᒪᕙᒃᖢᓂ. ᐸᐅᓗᓯ ᐊᓕᐊᓇᐃᒍᓱᒃᐳᖅ ᑕᒻᒪᕇᒃᑯᑎᖃᕐᓂᖓᓂ ᐃᒡᓕᓂᖓ ᑕᑯᒃᓴᐅᙱᒻᒪᑦ ᐱᖅᓯᓚᐅᖅᑐᒧᑦ. ᐃᒡᓕᓂᖃᙱᑦᑎᐊᖅᑐᑦ ᒪᓕᒐᒃᓴᒥᓂᑦ ᐊᖏᕐᕋᒧᑦ. ᐊᐳᑎᑦᑕᐅᖅ ᓴᐅᓯᓯᒪᕗᖅ ᐃᓂᒋᔭᓂ ᓯᑯᒥᑦ ᒪᑐᐃᖓᔪᒥᑦ ᐃᒪᖃᕐᓂᖓᓂ. ᑕᒪᒃᑯᐊ ᐅᓗᕆᐊᓇᖅᑐᐊᓗᐃᑦ ᕿᒧᒃᓯᓄᑦ ᐊᒻᒪᓗ ᐃᒻᒥᓄᑦ.
 
ᐆᒻᒪᑎᕐᔪᐊᖅ ᕿᒧᒃᓯᓂᒃ ᓴᖑᑎᑦᑎᓇᓱᒃᐳᖅ. ᑮᓯᐊᕐᔪᒃᐸᒃᖢᓂ ᐊᒻᒪᓗ ᒧᒡᒍᓛᑲᑕᒃᖢᓂ ᐃᓱᒃᖠᖅᐹᒥᑦ ᕿᒻᒥᒥᑦ, ᕿᒻᒥᕐᖑᓇ ᖃᓄᐃᑦᑐᐊᓗᒃ? ᐸᐅᓗᓯ ᐃᓱᒪᕗᖅ. ᕿᒧᒃᓯᖅ ᓄᖅᑲᖅᑎᖦᖢᓂᒋᑦ, ᑭᓴᖅᑎᖦᖢᓂᒋᑦ ᐊᒻᒪᓗ ᓯᕗᓂᐊᓄᑦ ᐱᓱᒃᖢᓂ ᕿᒧᒃᓰᑦ ᓯᕗᓂᐊᓄᑦ ᖃᓄᐃᑦᑐᖃᕐᒪᖔᑦ ᖃᐅᔨᓇᓱᒃᖢᓂ. ᐆᒻᒪᑎᕐᔪᐊᖅ ᑐᑮᕈᑎᓕᖅᑐᖅ, ᒧᒡᒍᓛᖅᖢᓂ ᐊᒻᒪᓗ ᑮᕌᕐᔪᑲᑕᒃᖢᓂᐅᒃ.
 
 
ᑐᑭᓯᕗᖅ ᖃᓄᐃᒻᒪᖔᑦ ᕿᓚᒥᑯᓗᒃ, ᑕᓕᖅᐱᒃ ᐃᓯᒐᖓ ᓱᕋᐃᖕᒪᑦ ᖄᖓᓂ ᐊᐳᒻᒥ ᐊᒻᒪᓗ ᐃᒫᖅᖢᓂ ᖁᒃᑐᕋᖏᓐᓄᑦ ᑎᑭᖦᖢᓂ ᑕᑯᒃᓴᐅᙱᑦᑐᒧᑦ ᐃᒪᕐᒧᑦ, ᑎᒥᖓ ᐃᒪᕐᒧᐊᖅᑎᑦᑕᐃᓕᒪᕈᓘᔭᖅᖢᓂᐅᒃ ᓂᒡᓕᓇᖅᑐᐊᓗᖕᒧᑦ ᐃᒪᕐᒧᑦ. ᐆᒻᒪᑎᖓ ᑎᓪᓕᕐᔪᐊᖅᐳᖅ, ᐊᓂᖅᑎᕆᓂᖓ ᐃᕝᕗᐊᖅᑐᕐᔪᐊᖅᖢᓂ. ᐃᒻᒥᓂ ᑭᕕᒐᓱᒃᑲᓗᐊᖅᖢᓂ ᓯᑯᒧᑦ ᐊᔪᖅᖢᓂ. ᐆᒻᒪᑎᕐᔪᐊᖅ ᐃᒻᒥᓄᑦ ᐅᐸᒍᑎᕗᖅ ᐊᒻᒪᓗ ᐸᐅᓗᓯ ᑎᒍᓯᓪᓗᓂ ᐃᐱᐅᑕᖓᓂ, ᓱᒃᑲᐃᑦᑐᒥ ᐆᒻᒪᑎᕐᔪᐊᖅ ᑭᖑᑉᐱᐊᖅᑐᖅᐳᖅ, ᓄᓱᒃᐸᓪᓕᐊᓪᓗᓂᐅᒃ ᐊᓱᐃᓛᒃ ᑎᒥᓂ ᓯᑯᒨᖅᑎᕈᓘᔭᕈᓐᓇᖅᓯᕙᐅᒃ ᐃᒪᕐᒦᑦᑐᓐᓃᖅᖢᓂ. ᓇᓚᓚᐅᑲᒃᖢᓂ ᕿᓚᒥᕈᓗᒃ, ᑎᓪᓕᕐᓂᖓ ᓱᒃᑲᐃᒡᓕᒋᐊᕋᓱᖕᓂᖓᓂ ᐊᓱᐃᓛᒃ ᓇᖏᖅᓯᓪᓗᓂ.

 


ᑎᑎᕋᖅᑕᐅᔪᖅ: ᐄᒍᐊ ᑐᕌᒍᔅᓛᕕᒃ - leaddog.ca


ᐊᑲᐅᙱᓕᐅᕈᑎᖃᒃᑲᓐᓂᓕᖅᐳᖅ. ᖁᐊᖅᑕᐃᓕᒪᔭᕆᐊᖃᓕᖅᐳᖅ. ᐊᑖᑕᑦᑎᐊᖓᑕ ᐅᖃᐅᓯᖏᑦ ᐃᖅᑲᐃᓪᓗᓂᒋᑦ: “ᖃᐅᓯᓕᑐᐊᕐᓂᕈᕕᑦ, ᐅᓪᓚᒋᑦ, ᖃᒧᑎᒥᑦ ᐃᑭᒪᙱᓪᓗᑎᑦ ᐊᒻᒪᓗ ᓱᕋᑦᑎᖅᐸᓪᓕᐊᓗᒋᑦ ᓂᓚᑦ ᐊᓐᓄᕌᕕᑦ ᓯᓚᑖᓂ ᕿᕿᑉᐸᓪᓕᐊᑎᓪᓗᒋᑦ. ᐊᐅᓚᐃᓐᓇᕐᓗᑎᑦ ᑕᐃᒫᒃ ᕿᕿᙱᑦᑐᓐᓇᖅᐳᑎᑦ.” ᐸᐅᓗᓯ ᐊᑐᖅᐳᖅ ᕿᓯᖕᓂ ᑲᒥᖕᓂᑦ (ᑲᒦᑦ) ᐊᓈᓇᑦᑎᐊᖓᑕ ᓴᓇᓚᐅᖅᓯᒪᔭᖏᓐᓂᑦ, ᐃᓯᒐᐃᔭᖃᑦᑕᔾᔮᙱᒻᒪᑦ. ᐅᖓᓯᒃᑐᐊᓘᓪᓗᓂ ᓱᓕ ᐊᖏᕐᕋᒧᑦ. ᓴᙱᔭᕆᐊᖃᖅᐳᖅ ᕿᐊᓱᙳᒐᓗᐊᖅᖢᓂ. ᓇᐅᑦᑎᖅᓱᒃᑲᓐᓂᕆᐊᖃᓕᖅᐳᖅ ᐃᒪᐃᓐᓇᓂᒃ ᓯᑯᒥᑦ.
 
 
ᐃᖏᕐᕋᓯᕗᑦ, ᐅᓪᓚᒃᓴᖃᑎᒋᓪᓗᓂᒋᑦ ᕿᒧᒃᓯᓂ ᐳᕙᖏᑦ ᑭᓯᐊᓂ ᖄᓕᒑᖅᑰᔨᓕᕐᒪᑕ, ᑭᓯᐊᓂ ᖃᒧᑎᒥᑦ ᐃᑲᒪᓚᐅᑦᑎᐊᙱᓚᖅ. ᐅᐃᕐᖓᓕᖅᐸᓪᓕᐊᕗᖅ, ᑭᓯᐊᓂ ᐅᓪᓚᒃᐳᖅ, ᐅᓪᓚᒃᐳᖅ, ᐆᒻᒪᑎᕐᔪᐊᖅ ᓴᓂᐊᓃᖏᓐᓇᖅᖢᓂ. ᐆᒻᒪᑎᕐᔪᐊᖅ ᖁᒥᒃᓯᐅᑉ ᓯᕗᓂᐊᓃᖦᖢᓂ ᓇᐅᑦᑎᖅᓱᖅᖢᓂ ᐃᒪᐃᓐᓇᒥᑦ. ᕿᒧᒃᓯᖅ ᓄᖅᑲᕋᒥ ᑕᖃᐃᖅᓯᕋᓱᐊᖅᖢᑎᒃ ᕿᓚᒥᑯᓗᒃ ᐱᓱᑲᑕᐃᓐᓇᖅᖢᓂ ᐊᐅᓚᐃᓐᓇᕋᓱᒧᑦ, ᓱᕋᑦᑎᖅᐸᓪᓕᐊᓪᓗᓂᐅᒃ ᓂᓚᒃ ᖁᐊᖅᐸᓪᓕᐊᔪᓂᑦ ᖃᕐᓕᒥᓄᑦ ᐊᒻᒪᓗ ᖁᓕᑦᑕᐅᔭᖓᑕ ᐊᑎᖓᓂ. ᓱᒃᑲᐃᒡᓕᒑᖓᑦ, ᐆᒻᒪᑎᕐᔪᐊᑉ ᒧᒡᒍᓛᕐᕕᒋᑲᑕᒃᐸᐅᒃ ᐊᒻᒪᓗ ᐱᓱᖃᑎᒋᓕᖅᐸᒃᖢᓂᐅᒃ. ᐊᓱᐃᓛᒃ ᐃᖏᕐᕋᓯᒃᑲᓐᓂᖅᐳᑦ, ᐅᓪᓚᒃᖢᑎᒃ ᐊᒻᒪᓗ ᐅᓪᓚᒃᖢᑎᒃ ᕿᒧᒃᓯᕐᓗ ᑲᖏᖅᖢᒑᐱᖕᒧᑦ.
 
 
ᐃᓱᖃᖅᑰᔨᙱᖦᖢᓂ ᑭᓯᐊᓂ ᐊᓱᐃᓛᒃ, ᑲᖏᖅᖢᒑᐱᐅᑉ ᐃᑯᒪᖏᑦ ᑕᑯᕙᖏᑦ ᐅᖓᓯᒃᑐᒥ, ᐊᖏᕐᕋᕆᐊᒃᓯᕗᑦ.
 
 

ᖃᓂᒡᓕᖕᒪᑕ ᓄᓇᓕᖕᓄᑦ, ᐱᖓᓱᐃᑦ ᓯᑭᑑᑦ ᓱᒃᑲᓴᖅᖢᑎᒃ ᐸᕐᕆᐊᕆᐊᖅᐳᑦ, ᐊᑖᑕᑦᑎᐊᖓ ᐊᒻᒪᓗ ᐊᒃᑲᖏᑦ ᐊᕙᓗᓯᓪᓗᑎᒃ ᐅᓕᒃᑕᐅᓪᓗᓂ ᒥᖅᑯᓄᑦ. ᐆᓇᖅᑐᒥ ᑏᖃᖅᐳᑦ ᐊᒻᒪᓗ ᐃᒥᖅᐳᖅ. ᐊᐱᕆᔭᐅᓪᓗᓂ ᖃᓄᐃᓕᓚᐅᕐᒪᖔᑦ, ᐅᓂᒃᑲᐅᑎᓪᓗᓂᒋᑦ, ᐆᒻᒪᑎᕐᔪᐊᖅ ᓴᓂᐊᓃᖦᖢᓂ.
 

 

ᐊᑖᑕᑦᑎᐊᖓ ᐅᖃᖅᐳᖅ, “ᑖᓐᓇ ᕿᒻᒥᖅ ᐃᓂᒃᓴᖃᕈᓐᓇᖅᓯᕗᖅ ᕿᒧᒃᓯᖁᑎᓐᓂ ᑐᕌᒐᒃᓴᒥᑦ. ᐊᑦᑎᑦᑎᐊᖅᓯᒪᔪᐊᓘᕗᖅ. ᐊᒻᒪᓗ ᐃᕝᕕᑦᑕᐅᖅ ᐃᕐᙳᑖᒃ, ᐃᓚᐅᔪᓐᓇᖅᑐᑎᑦ ᑐᕌᒐᒃᓴᒧᑦ ᐃᓚᒋᔭᐅᓗᑎᑦ ᐃᑲᔪᖅᓱᐃᔨᒋᓂᐊᖅᑕᓐᓂᑦ. ᐱᑦᑎᐊᖅᑐᐊᓘᕗᑎᑦ”

 

ᑎᑎᕋᖅᑕᐅᔪᖅ: ᐄᒍᐊ ᑐᕌᒍᔅᓛᕕᒃ - leaddog.ca